ab kya kahen kisi se ye apni zaban se ham
be-zar ho chuke hain fareb-e-jahan se ham
nazzara-e-jamal ka aalam ajiib tha
mad.hosh o be-ḳhabar the vahan be-zaban se ham
ab hal-e-iztirab-e-tabi.at na puchhiye
taḌpe hain umr bhar tire dard-e-nihan se ham
ye zor-e-barq-o-bad ye tufan al-aman
mahrum ho na jaa.en kahin ashiyan se ham
jin ki mahak se ruuh pe taari hai be-ḳhudi
vo phuul chun rahe hain tire gulistan se ham
ta.amir-e-nau hai parda-e-taḳhrib men nihan
samjhe hain raz-e-dahr ye daur-e-jahan se ham
manzil pe ho rahi hain qayamat ki shorishen
ghafil paḌe hue hain magar karvan se ham
naseh! ḳhayal-e-tark-e-mohabbat se fa.eda
vaqif nahin hain kya alam-e-javedan se ham
ai ‘naqsh’ muḳhtasar ye haqiqat hai maut ki
phir aa ga.e vahin pe chale the jahan se ham
Leave a Reply