Saghar Nizami
raton ko tasavvur hai un ka aur chupke chupke rona hai
ai sub.h ke taare tu hi bata anjam mira kya hona hai
in nau-ras ankhon valon ka kya hansna hai kya rona hai
barse hue sachche moti hain bahta hua ḳhalis sona hai
dil ko khoya ḳhud bhi kho.e duniya khoi diin bhi khoya
ye gum-shudagi hai to ik din ai dost tujhe bhi khona hai
tam.iz-e-kamal-o-naqs uTha ye to raushan hai duniya par
main chandan huun tu kundan hai main miTTi huun tu sona hai
tu ye na samajh lillah ki hai taskin tire divanon ko
vahshat men hamara hans paḌna dar-asl hamara rona hai
matam hai miri avaz shikast-e-saz-e-dil-e-sad-para ka
‘saghar’ mera naghma bhi dipak ke suron men rona hai
Leave a Reply