Chand Akbarabadi
bazar tire shahr ke badnam bahut hain
chhoTi si ḳhushi ke bhi yahan daam bahut hain
main kaise chalun hausle ka haath pakaḌ kar
is zindagi men gardish-e-ayyam bahut hain
honTon se baghavat ki sada kaise ho jaari
vaa.iz ko hukumat se abhi kaam bahut hain
is daur men ummid karun adl ki kaise
munsif pe hi jab qatl ke ilzam bahut hain
aghosh men aur vaqt ke baaqi hain suḳhnavar
‘ghalib’ bhi ka.i ‘mir’ bhi ‘ḳhayyam’ bahut hain
ye shahr bhi mahfuz nahin qahr-e-ḳhuda se
saaqi bhi hain mai-ḳhane bhi hain jaam bahut hain
vo zaat hai vahid vo hi ḳhaliq vo hi raziq
maḳhluq ne par us ko diye naam bahut hain
imdad-o-ibadat men riya-kari na ho ‘chand’
iḳhlas-e-amal par vahan in.aam bahut hain
Leave a Reply