Parveen Kumar Ashk
samundar aankh se ojhal zara nahin hota
nadi ko Dar kisi chaTTan ka nahin hota
vo jab bhi rota hai main saath saath rota huun
maze ki baat hai us ko pata nahin hota
musafiron ke liye manzilen hi hoti hain
musafiron ke liye rasta nahin hota
tamasha-gah men kis ka tamasha hota hai
tamash-binon ko us ka pata nahin hota
main roz phone par us ko sada.en deta huun
ḳhuda ke saath mira rabta nahin hota
jahan milen unhen sajda guzariye sahab
mohabbaton ke liye sochna nahin hota
vahan charagh jalata huun zindagi ka ‘ashk’
jahan hava ke liye rasta nahin hota
Leave a Reply