Shikwe Zaban Pe Aa Saken Is Ka Sawal Hi Na Ho

Syed Hamid

shikve zaban pe aa saken is ka saval hi na ho

un se jafa ka zikr kya jin ko ḳhayal hi na ho

dil hi to hai zaban nahin shikva nahin karenge ham

lekin ye shart kis liye ji ko malal hi na ho

mizhgan pe vaan nigah-e-lutf honTon pe yaan hadis-e-shauq

apne hudud se baḌhen is ki majal hi na ho

shauq ko intizar-e-lutf lutf ko intizar-e-shauq

baat bane bhi kya jahan pursish-e-hal hi na ho

Thes ghurur ko lagi qahr bani nigah-e-lutf

qahr bhi zid se to amaan jis ko zaval hi na ho

lutf na tha jise nasib qahr ki taab laa.e kyuun

ishq ki ḳhud-farebiyan jaise ḳhayal hi na ho

‘hamid’-e-nau-asir se charḳh-e-kuhan ne kya kaha

hai vo hayat ra.egan jo pa.emal hi na ho