Munawwar Rana
kisi gharib ki barson ki aarzu ho jaun
main is surang se niklun tu ab-ju ho jaun
bada hasin taqaddus hai us ke chehre par
main us ki ankhon men jhankun to ba-vazu ho jaun
mujhe pata to chale mujh men aib hain kya kya
vo aaina hai to main us ke ru-ba-ru ho jaun
kisi tarah bhi ye viraniyan hon khatm miri
sharab-khane ke andar ki hav-hu jaun
miri hatheli pe honton se aisi mohr laga
ki umr-bhar ke liye main bhi surkh-ru ho jaun
kami zara si bhi mujh men na koi rah jaae
agar main zakhm ki surat huun to rafu ho jaun
nae mizaj ke shahron men ji nahin lagta
purane vaqton ka phir se main lucknow ho jaun
Leave a Reply