afsurdagi-e-dard-e-faraqat hai sahar tak
ye shaam to ik sham-e-qayamat hai sahar tak
koi to andheron men ujalon ka sabab ho
maana ki charaghon ki haqiqat hai sahar tak
ab ham pe jo aa.i to kisi taur na guzri
sunte the shab-e-gham ki tavalat hai sahar tak
phir raakh bhi ho jaa.en to ho jaa.en bala se
ankhon ke havalon ki zarurat hai sahar tak
jis raat khula mujh pe vo mahtab ki surat
vo raat sitaron ki amanat hai sahar tak
suraj pe hukumat hai yahan dida-varon ki
sinon ki sulagne ki ijazat hai sahar tak
gunjega har ik halqa-e-zanjir-e-asiran
ḳhamoshi-e-zindan ki aziyyat hai sahar tak
ye raqs-e-bala saz-e-junun-ḳhez pe ‘az.har’
ye mahfil-e-hangama-e-vahshat hai sahar tak
Leave a Reply