tumhen mire ḳhayal ki musavviri qubul ho
jadid-tar faza-e-alf-lailavi qubul ho
haqiqaton ki talḳhiyon ke mas.ale kuchh aur hain
magar ḳhayal-o-ḳhvab ki ye sha.iri qubul ho
tumhara jism ma.abad-e-tasavvur-e-nashat hai
mufakkir-e-bahar ki ye bandagi qubul ho
ba-vasf-e-ilm-o-fan jinhen kabhi sukun na mil saka
bahut hai gar unhen nashat-e-arzi qubul ho
hayat ḳhud miri hi fikr ka hasin tilism hai
agar jahan ko bhi ye sehr-e-samri qubul ho
tumhare husn ke tufail ḳhizr-e-shahr-e-raz ko bhi
‘salam’ aise sha.iron ki kaj-ravi qubul ho
Leave a Reply