Naseem Nikhat
na.e rishton se tu dil ka makan abad karta hai
ḳhabar bhi hai tujhe ik shaḳhs tujh ko yaad karta hai
na jaane kyuun ziden aisi dil-e-nashad karta hai
jise main bhulna chahun usi ko yaad karta hai
mahak teri tujhe taslim karva le to kaafi hai
ai mere phuul tu rangon ko kyon barbad karta hai
badalta hai miri zanjir pinjra bhi badalta hai
magar azad kab mujh ko mira sayyad karta hai
parinda bhuul baiTha ḳhud hi jab parvaz ke ma.ana
karam-farma bata ab kyon use azad karta hai
muqarrar hai ḳhizan ka ek din har haal men ‘nik.hat’
bhala gul-dan men ye phuul kyon fariyad karta hai
Leave a Reply