Guhar Khairabadi
main ik musafir-e-tanha mira safar tanha
dayar-e-ghair men phirta huun dar-ba-dar tanha
mire ḳhilaf tamam andhiyan zamane ki
main ik charagh sadaqat ki raah par tanha
hai ek bhiiḌ magar koi bhi rafiq nahin
main sochta huun ki main bhi huun kis qadar tanha
na meTe miT sakin tanha.iyan muqaddar ki
ki rah ke baagh men bhi hai shajar shajar tanha
tire bhi siine men apnon ka dard jagega
dayar-e-ghair men koi to shaam kar tanha
koi to baḌh ke ye kahta ki rah-ravan-e-vatan
hai karvan-e-mohabbat ka rahbar tanha
chaman men gunje sada bhi to kis tarah gunje
parinda shaḳh pe bola to hai magar tanha
baḌe muhib nazar aa.e hal-o-mustaqbil
jab apne maazi ko socha hai baiTh kar tanha
nigah puḳhta hai jis ki vahi ḳharidega
hai sang-rezon ke bazar men ‘guhar’ tanha
Leave a Reply