Osama Khalid
kabhi hota hai pareshan kabhi sharmata hai
a.ina mere ḳhad-o-ḳhal se ghabrata hai
rengte rengte ik aah mujhe khinchti hai
aur ik ḳhauf mire jism men dar aata hai
ḳhud bhi main ḳhak-zada ḳhasta badan huun pa mujhe
apne kashkol ki halat pe taras aata hai
yak-ba-yak ek charagh apni taraf khinchta huun
azhdaha dekhta hai aur lipaT jaata hai
kitna manus hai mujh se tire honTon ka sukut
muskura.un to mire halq tak aa jaata hai
rafta rafta mujhe jhinjhoḌta hai sabz-e-ḳhuda
jaise dimak koi lakḌi ki ghiza khata hai
shaam ke vaqt lahu rang-e-mohabbat ki tarah
koi aata hai rulata hai chala jaata hai
Leave a Reply