muddat se hai libas-e-badan taar taar dost
maila bhi hai utaar ab is ko utaar dost
baḳhiye ki ab jagah hai na paivand ki jagah
kya si rahe hain is ko tire gham-gusar dost
tha jis men zindagi ka guman vo to ja chuki
ye zindagi hai us ke qadam ka ghubar dost
jo zindagi thi laghzish-e-paiham ka silsila
hai jumbish-e-ḳhafif use nagavar dost
aage jo ja chuka hai vo har lamha-e-hayat
tujh ko pukarta hai sun us ki pukar dost
halat ne jo laad diya teri piiTh par
gardan jhaTak ke phenk de jaldi vo baar dost
thi zindagi ḳhuda ka ghazab aur ‘maz.hari’
maut ik ḳhuda ka pyaar hai le us ka pyaar dost
Leave a Reply