Taruna Mishra
ibadat ke liye bas rab nahin hai
mohabbat se baḌa maz.hab nahin hai
main suraj huun mujhe Dhalna hi hoga
mire hisse men koi shab nahin hai
jo kahna chahti huun tum vo samjho
miri baton ka vo matlab nahin hai
ye kaisa shahr hai jaage hai shab-bhar
yahan jiine ka koi Dhab nahin hai
nazar kya mil ga.i us ki nazar se
tamanna dil men koi ab nahin hai
bahut mushkil hai jiina zindagi ka
kala hai ye koi kartab nahin hai
jirah men sab ke sab uljhe hue hain
kisi ki baat ka matlab nahin hai
Leave a Reply