un ko dil de ke pashemani hai
ye bhi ik tarah ki nadani hai
vasl se aaj naya hai inkar
tum ne kab baat miri maani hai
aap dete hain tasalli kis ko
ham ne ab aur hi kuchh Thani hai
haal bin puchhe kahe jaata huun
apne matlab ki ye nadani hai
kis qadar baar huun gham-ḳhvaron par
kya subuk meri giran-jani hai
ghar bula kar vo mujhe lauTte hain
ye na.i tarah ki mehmani hai
ham se vahshat ki na le o majnun
ham ne bhi ḳhaak bahut chhani hai
ḳhaak uḌti hai jidhar jaata huun
kya muqaddar ki pareshani hai
ghar bhi virana nazar aata hai
haa.e kya be-sar-o-samani hai
aa.i kyuun un ki shikayat lab tak
ham ko ḳhud us ki pashemani hai
kahin do din na raha jam ke ‘hafiz’
ek avara hai sailani hai
Leave a Reply