uzr hava ne kya rakkha hai
kaisa shor macha rakkha hai
ik be-nam ta.alluq men bhi
ḳhauf bichhaḌne ka rakkha hai
dekho ham ne is lamhe ka
kitna bojh uTha rakkha hai
us ki ankhen dekh raha huun
jis ne jaal bichha rakkha hai
dhuup men us ne kis ki ḳhatir
chhat par chand uga rakkha hai
tum pagal ho tum kya jaano
kis ke dil men kya rakkha hai
ham ne teri ḳhatir hi to
ankhon men rasta rakkha hai
aaj ghazal kuhni thi ham ne
tum ko paas biTha rakkha hai
‘qais’ apni divar men ham ne
ek diya dafna rakkha hai
Leave a Reply