nahin zarur ki takmil-e-mudda.a dekhen
magar hai ji men ki ḳhun-e-jigar baha dekhen
nuqush-e-pa jo hue ja rahe hain gard unhen
thakavaton se sharabor log kya dekhen
ye kya safar hai ki sidhe-sapaT raste hain
kabhi to ham koi pur-pech rasta dekhen
fasil-e-shab se udhar de raha ho koi sada
hisar-e-ḳhvab men lekin mujhe ghira dekhen
faza men tair rahe hon hare-bhare chehre
ḳhud apne chehre ko lekin bujha hua dekhen
safar men shal hue jaate huun dhuup ke paanv
ufuq ki aankh se bahti hui hina dekhen
tulu-e-mahr se pahle bas ek pal ke liye
kisi diye ki tarah ham bhi jhilmila dekhen
ye din bhi ‘ḳhalid’-e-shiraz dekhne the hamen
nazar uTha.en to patjhaḌ ka silsila dekhen
Leave a Reply