Rasheed Lakhnavi
jis ko aadat vasl ki ho hijr se kyunkar bane
jab uThe ye gham ki dil ka aa.ina patthar bane
ab jo vo banva.en gahna yaad rakhna gul-farosh
phuul bach jaa.en to meri qabr ki chadar bane
ba.ad ara.ish bala.en kaun lega mere ba.ad
yaad karna mujh ko jab zulf-e-pari-paikar bane
hai tumhare samne to jaan ka bachna muhal
tum se jab chhuTen to dekhen ghair se kyunkar bane
donon ashiq tere aur donon ki yakja bud-o-bash
meri jaan jan-o-jigar men dekhiye kyunkar bane
arzu-mand-e-shahadat ki vasiyyat sab se hai
naam khoda jaa.e mera jab koi ḳhanjar bane
dil mushabbak ho gaya tir-e-nigah-ḳhana se
ab tumhari yaad ke aane ko lakhon ghar bane
ghair se koi ta.alluq hi na rakh ai jang-ju
gar bigaḌ mujh se bigaḌ jo kuchh bane mujh par bane
ḳhuftagan-e-ḳhak chaunk uTThe chale kuchh aisi chaal
aaj to ai meri jaan tum fitna-e-mahshar bane
chahte ho tum rahun mar kar bhi main qadmon se duur
kahte ho qabr us ki mere kuche se bahar bane
mar ke bhi paa.en lab-e-saqi ka bosa kya majal
vaan na pahunche gar hamari ḳhaak ka saghar bane
daman-e-qatil ke dhabbon ki gavahi ho zarur
gar hamare ḳhuun ka ai dosto mahzar bane
dil mujhe achchha bura jaisa banaya de diya
sar to koi puchhta kaisa bane kyunkar bane
qabr ka kona ho maskan dam nikal jaa.e ‘rashid’
ḳhana-e-tan gir chuke jaldi ki apna ghar bane
Leave a Reply