na jaane kya hue atraf dekhne vaale
tamam shahr ko shaffaf dekhne vaale
giraft ka koi pahlu nazar nahin aata
malul hain mire ausaf dekhne vaale
siva.e raakh koi chiiz bhi na haath aa.i
ki ham the varsa-e-aslaf dekhne vaale
hamesha band hi rakhte hain zahiri ankhen
ye tirgi men bahut saaf dekhne vaale
mohabbaton ka koi tajraba nahin rakhte
har ek saans ka israf dekhne vaale
ab us ke ba.ad hi manzar hai sang-bari ka
sambhal ke barish-e-altaf dekhne vaale
ganva.e baiThe hain ankhon ki raushni ‘shahid’
jahan-panah ka insaf dekhne vaale
Leave a Reply