Na Jaane Kya Hue Atraf Dekhne Wale

na jaane kyā hue atrāf dekhne vaale

tamām shahr ko shaffāf dekhne vaale

giraft kā koī pahlū nazar nahīñ aatā

malūl haiñ mire ausāf dekhne vaale

sivā.e raakh koī chiiz bhī na haath aa.ī

ki ham the varsa-e-aslāf dekhne vaale

hamesha band hī rakhte haiñ zāhirī āñkheñ

ye tīrgī meñ bahut saaf dekhne vaale

mohabbatoñ kā koī tajraba nahīñ rakhte

har ek saañs kā isrāf dekhne vaale

ab us ke ba.ad hī manzar hai sañg-bārī kā

sambhal ke bārish-e-altāf dekhne vaale

gañvā.e baiThe haiñ āñkhoñ kī raushnī ‘shāhid’

jahāñ-panāh kā insāf dekhne vaale

Leave a Comment