Kaukab Zaki
apne jalvon ko yuun na aam karo
kuchh to parde ka ehtimam karo
zulmaton ki bisat hi kya hai
tum charaghon ka intizam karo
ḳhush-dili se mila karo sab se
ḳhanda-peshani apni aam karo
ye na bhulo ki tum muhafiz ho
yuun na insan ka qatl-e-am karo
apne ajdad hon na sharminda
aisa vaisa na koi kaam karo
is se dil ka sukun milta hai
zikr allah ka mudam karo
muflison ko na dekho nafrat se
tum gharibon ka ehtiram karo
yuun numa.ish karo na daulat ki
is bura.i ka iḳhtitam karo
chahte ho ki barguzida hon
tum haqa.eq ko apne naam karo
mujh ko tum se baḌi mohabbat hai
mere jazbe ka ehtiram karo
agli naslon ko jis se faiz mile
aisa duniya men koi kaam karo
ye na.e ahd ka taqaza hai
qatilon ka bhi ehtiram karo
tez raftar hai zamana ‘zaki’
tum zakavat ko tez-gam karo
Leave a Reply