ahl-e-jahan ko mujh se adavat hai kya karun
ye tarz-e-intiqam-e-mohabbat hai kya karun
nakami-e-vafa pe nadamat hai kya karun
ai dil ye ek talḳh haqiqat hai kya karun
ḳhud gham-pasand meri tabi.at hai kya karun
is ko har ek ranj men rahat hai kya karun
iz.har-e-dard-e-dil bhi kuchh asan nahin magar
zabt-e-sitam bhi ek musibat hai kya karun
apna raha huun gham ko baḌe ehtiram se
roz-e-azal se ye miri aadat hai kya karun
dil ka qarar chhin liya kis ki yaad ne
ye zindagi-e-hijr musibat hai kya karun
mere payam-e-mehr-o-vafa ka asar ho kya
duniya hi be-niyaz-e-mohabbat hai kya karun
be-vaj.h jis ke naaz uThata huun raat din
us bevafa ko mujh se adavat hai kya karun
apni musibaton ka kisi se gila nahin
apna hi dil mire liye aafat hai kya karun
dil men taḌap hai soz hai gham hai malal hai
ai jazb-e-shauq ye miri qismat hai kya karun
arman aish ka na tamanna nashat ki
jo mil gaya usi pe qana.at hai kya karun
himmat-shikan hain rah-e-mohabbat ke marhale
har moḌ har qadam pe musibat hai kya karun
ḳhud mera dil bhi baat miri manta nahin
is par bhi ab kisi ki hukumat hai kya karun
kya ḳhuub hai ye alam-e-duniya-e-shauq bhi
ik bevafa se mujh ko mohabbat hai kya karun
aa.e na aa.e dil ko yaqin lekin ai ‘kanval’
un ke har ek va.ade men lazzat hai kya karun
Leave a Reply