Shab Ko Phire Wo Rashk-E-Mah Khana-Ba-Khana Ku-Ba-Ku

shab ko phire vo rashk-e-mah khana-ba-khana ku-ba-ku

din ko phirun main dad-khvah khana-ba-khana ku-ba-ku

qibla na sar-kashi karo husn pe apne is qadar

tum se bahut hain kaj-kulah khana-ba-khana ku-ba-ku

khana-kharab-e-ishq ne kho ke miri haya-o-sharm

mujh ko kiya zalil aah khana-ba-khana ku-ba-ku

tu ne jo kuchh ki ki jafa ta-dam-e-qatl main sahi

meri vafa ke hain gavah khana-ba-khana ku-ba-ku

teri kamand-e-zulf ke mulk-ba-mulk hain asiir

bismil-e-khanjar-nigah khana-ba-khana ku-ba-ku

kal tu ne kis ka khuun kiya mujh ko bata ki aaj hai

shor o fughan o aah aah khana-ba-khana ku-ba-ku

mujh ko bula ke qatl kar ya to mire gunah bakhsh

huun main kahan talak tabah khana-ba-khana ku-ba-ku

sina-figar o jama-chak girya-kunan o naara-zan

phirte hain tere dad-khvah khana-ba-khana ku-ba-ku

‘taban’ tire firaq men sar ko patakta raat din

phirta hai misl-e-mahr-o-mah khana-ba-khana ku-ba-ku

Leave a Comment