Rukhsaar Nazimabadi
ham unhen yunhi azma.enge
pyaar men shart kyuun laga.enge
ye parinde hain ashiyane ko
par nikalte hi bhuul ja.enge
yaad rakhna tumhari ankhon men
ham bahut jald jhilmila.enge
kya tumhen tab yaqin aa.ega
log jab ungliyan uTha.enge
darmiyan apne aa ga.i jo ḳhalij
us par ik roz pul bana.enge
bevafa zindagi ke rishte ko
aḳhiri saans tak nibha.enge
ek baazi tiri ḳhushi ke liye
tujh se danista haar ja.enge
daur aisa bhi ek aa.ega
zarf kam-zarf azma.enge
aap ko ajizi jata.egi
vo takabbur men haar ja.enge
pyaar ki guftugu nahin kiije
zaḳhm so.e hain jaag ja.enge
Leave a Reply