Na Puchho Kaise Himmat Kar Rahe Hain

vna pūchho kaise himmat kar rahe haiñ

jo ham phir se mohabbat kar rahe haiñ

na jaane kyā chhupānā chāhte haiñ

jo ham itnī vazāhat kar rahe haiñ

yahī bachche imāmat bhī kareñge

jo masjid meñ sharārat kar rahe haiñ

ḳhushī meñ kis tarah nikleñge aañsū

abhī aañsū riyāzat kar rahe haiñ

hamārī tāj-poshī multavī ho

abhī to log bai’at kar rahe haiñ

mire āñgan meñ kuchh bhūke parinde

musalsal merī ġhībat kar raheñ haiñ

kabhī ajdād ne kī thī baġhāvat

lihāzā ham hukūmat kar rahe haiñ

Leave a Comment