Abdussamad Tapish
jafa ke zikr pe vo bad-havas kaisa hai
zara si baat thi lekin udaas kaisa hai
na jaane kaun fazaon men zahr ghol gaya
hara-bhara sa shajar be-libas kaisa hai
miri tarah se na haq baat tum kaho dekho
bala ka saaya mire as-pas kaisa hai
ye faisla hai ki ham apne haq se baaz aaen
to phir ye lahja ye tira, iltimas kaisa hai
vahi jo shahr ke logon men tha bahut bad-nam
vahi to aaj sarapa sipas kaisa hai
main kya kahun ki main kyuun dil se ho gaya majbur
tum hi batao ki vo khush-libas kaisa hai
Leave a Reply