Tanveer Ahmad Alvi
fishar-e-husn se aghosh-e-tang mahke hai
saba ke lams se phulon ka rang mahke hai
ada-e-nim-nigahi bhi kya qayamat hai
ki ban ke phuul vo zaḳhm-e-ḳhadang mahke hai
ye vahshaten bhi miri ḳhushbuon ka hissa hain
ki mire ḳhuun se daman-e-sang mahke hai
ada-e-naz bhi hai husn-o-ihtizaz ki baat
ki tar-e-zulf nahin ang ang mahke hai
lahu ke phulon se arasta hai tegh-e-sitam
shafaq shafaq jo ye maqtal ka rang mahke hai
charagh-e-lala se raushan hua hai dasht-e-vafa
hava-e-dil se ye naqsh-e-farang mahke hai
shakar-labon ke tabassum ki baat kya ‘tanvir’
nafas nafas men mai-e-lala-rang mahke hai
Leave a Reply