log jo dil-figar hote hain
chalte phirte mazar hote hain
jo mohabbat men ḳhaar hote hain
sahab-e-sad-vaqar hote hain
jin ke daman men ḳhaar hote hain
qadr-dan-e-bahar hote hain
jo mohabbat-shi.ar hote hain
sazishon ka shikar hote hain
meri barbadi-e-mohabbat par
aap kyon sharmsar hote hain
un ke qaul-o-qarar kya kahiye
sirf qaul-o-qarar hote hain
apna matlab nikalne vaale
kis qadar hoshiyar hote hain
pur-ḳhuluson ki puchhte kya ho
ḳhaar hote the ḳhaar hote hain
kya ḳhabar thi ki rah-e-ulfat men
har qadam ḳharzar hote hain
kis tavaqqo pe log ai ‘asi’
zindagi par nisar hote hain
Leave a Reply