hijr ik husn hai is husn men rahna achchha
chashm-e-be-ḳhvab ko ḳhun-nab ka gahna achchha
koi tashbih ka ḳhurshid na talmih ka chand
sar-e-qirtas laga harf-e-barhana achchha
paar utarne men bhi ik surat-e-gharqabi hai
kashti-e-ḳhvab rah-e-mauj pe bahna achchha
yuun nasheman nahin har roz uThae jaate
usi gulshan men usi daal pe rahna achchha
be-dili shart-e-vafa Thahri hai me.aar to dekh
main bura aur mira ranj na sahna achchha
dhuup us husn ki yak-lahza mayassar to hui
phir na ta-umr laga saae men rahna achchha
dil jahan baat kare dil hi jahan baat sune
kar-e-dushvar hai us tarz men kahna achchha
Leave a Reply