mazlum kisi dast-e-hina.i ke nikalte
jo log irade se gada.i ke nikalte
ghazlen miri un par na giran itni guzartin
pahlu jo kahin mad.h-sara.i ke nikalte
sayyad ko kya janiye kya vahm guzarta
ahkam agar meri riha.i ke nikalte
barbadi-e-dil ka jo miri chhiḌta fasana
afsane tire dast-e-hina.i ke nikalte
mahrumi-e-taqdir ka ehsas na hota
mauqe jo kisi dar pe rasa.i ke nikalte
main mohr-ba-lab tha yahi achchha hua varna
ilzam mire sar hi bura.i ke nikalte
ai ‘shauq’ mira rang-e-ghazal aur hi hota
sadme jo mire dil se juda.i ke nikalte
Leave a Reply