Vijay Sharma
tamam ret pe bikhra hai tan udasi ka
vo lahar hai ya koi pairahan udasi ka
hai ik daricha jahan se vo dekhti hai atiit
so lag gaya mire kamre men man udasi ka
men us ki chhanv men baiThun to jism jalta hai
mire shajar pe laga hai gahan udasi ka
hamare ishq ko qudrat ne jaan baḳhshi hai
tum ik sukut ho aur main huun ban udasi ka
tumhare hijr men ik maut aur us ke ba.ad
hamari ruuh ne pakḌa badan udasi ka
Leave a Reply