Anwar Sabri
inqilab-e-sahar-o-sham ilahi tauba
asar-e-gardish-e-ayyam ilahi tauba
fitrat-e-bada-e-rangin men nahin kaif o nashat
rind hain morid-e-ilzam ilahi tauba
sehn-e-gulshan men baharon ne bichha rakkhe hain
laala o gul ke hasin daam ilahi tauba
alam-e-naza men palkon pe larazte aansu
ishq ka aḳhiri paigham ilahi tauba
gulshan-e-fikr pe ‘anvar’ hai giran-bar mizaj
sher ki barish-e-ilham ilahi tauba
Leave a Reply