Nazm Tabatabai
pursish jo hogi tujh se jallad kya karega
le ḳhuun main ne baḳhsha tu yaad kya karega
huun daam men pur-afshan aur sadgi se hairan
kyuun tez ki hain chhuriyan sayyad kya karega
zalim ye soch kar ab deta hai bosa-e-lab
jab honT si diye phir fariyad kya karega
zanjir tar-e-daman hai tauq ik gareban
zor-e-junun na kam ho haddad kya karega
ham Duub kar marenge hasrat rahegi tujh ko
jab ḳhaak hi na hogi barbad kya karega
yaqub qat.a kar den ummid-e-vasl dil se
yusuf sa banda koi azad kya karega
dil le ke puchhta hai tu kis ka shefta hai
bhula abhi se zalim phir yaad kya karega
ai ḳhatt-e-bayaz aariz darkar hai jo tujh ko
tahrir husn ki kuchh rudad kya karega
kunj-e-qafas se ik din hogi riha.i apni
mar ja.enge to aḳhir sayyad kiya karega
misl-e-sipand dil hai betab soz-e-gham men
rah ja.ega taḌap kar fariyad kya karega
ai shaiḳh bhar gaya hai kyuun va.az ki hava men
rish-e-safed apni barbad kya karega
zulm-o-sitam se bhi ab zalim ne haath khincha
is se sitam vo baḌh kar ijad kya karega
az-bas-ki be-hunar huun main nang-e-mo’tariz huun
mazmun pe mere koi i.rad kya karega
ai ”nazm” jis ko chahe vo de bahisht dozaḳh
namrud kya karega shaddad kya karega
Leave a Reply