mohabbat aur ḳhushbu ka nagar taqsim ho jaa.e
kahin aisa na ho ghar ka shajar taqsim ho jaa.e
lahu roti hui ankhen lahu roti hi rahti hain
havas ke haath jab purkhon ka ghar taqsim ho jaa.e
kabhi bhi aag ki faslen yahan par ug nahin saktin
mohabbat saare aalam men agar taqsim ho jaa.e
udasi ke ghane jangal men raste ja nikalte hain
fazaon men naya jab ek Dar taqsim ho jaa.e
kabhi jo yaad karti huun tiri qurbat ke lamhon ko
miri sanson talak us ka asar taqsim ho jaa.e
miri maan ki duaon ka ‘samina’ mo.ajiza dekho
mire pairon men aate hi bhanvar taqsim ho jaa.e
Leave a Reply