gar kahun ghair se phir rabt hua tujh ko kya
kya bura maan ke kahta hai bhala tujh ko kya
sar uthana tujhe balin se jo dushvar hai ab
kyuun dila baithe-bithae ye hua tujh ko kya
puchhun ranjish ka sabab us se to jhunjhla ke kahe
”gar khafa huun to main huun aap ko, ja tujh ko kya”
ham asiran-e-qafas kya kahen khamosh hain kyuun
raah le apni chal ai bad-e-saba tujh ko kya
gar kiya us se juda mujh ko to kah de ye falak
mere aur us ke na milne se mila tujh ko kya
haath uthata nahin gar ishq se main ai naseh
tu nasihat se miri haath utha tujh ko kya
gar kaho nam-e-khuda lagte ho tum kya hi bhale
to ye kahta hai ”bhala huun to bhala, tujh ko kya”
kyuun dila bistar-e-gham par hai tu khamosh pada
kuchh to kah mujh se kisi ne ye kaha tujh ko kya
ab vo mauquf hua nama-o-paigham bhi aah
harf ghairon ka asar kar hi gaya tujh ko kya
mere milne se kiya mana kisi ne jo tujhe
tu ne is baat ko sun kar na kaha tujh ko kya
paik-e-ashk ankhon se chal nikle jo khat padhte hi
‘jurat’ ab kuchh tu bata us ne likha tujh ko kya
Leave a Reply