Salim Saleem
na.e jahanon ka ik isti.ara kar ke laao
badan ki ḳhaak uThao sitara kar ke laao
vagarna ishq men ik aanch ki kami hogi
ye dil hai jaao ise para-para kar ke laao
tumhare paas hi ham ḳhud ko chhoḌ aa.e hain
kabhi tum aao to ham ko hamara kar ke laao
havas ke gahre samundar se hain ghire hue ham
hamare samne ḳhud ko kinara kar ke laao
tamam bichhḌe huon ko milao aaj ki raat
tamam kho.e huon ko ishara kar ke laao
Leave a Reply