jacha na kuchh bhi nigahon ko muntaha ke siva
jhuka ye sar na kahin un ke naqsh-e-pa ke siva
hazar minnaten kiin laakh haath phaila.e
mila na kuchh bhi magar zaḳhm-e-iltija ke siva
siva.e us ke nahin aur kuchh bhi paas mire
tujhe main duun bhi to kya dost ab dua ke siva
yahi havas hai ki saara jahan ho zer-e-nagin
jahan men kuchh bhi nahin aur is hava ke siva
ḳhulus shart hai avval bhi aur aḳhir bhi
dayar-e-ishq men sab hech hai vafa ke siva
labon pe harf-e-vafa hai dilon men bair magar
kahun main kya use yaron ki ik ada ke siva
aziiz kyuun na ho ai ‘chand’ mujh ko ye daulat
bacha bhi kya hai mire paas ab ana ke siva
Leave a Reply