Poet
sab hasinon men vo pyara ḳhuub hai
ek chehra jism saara ḳhuub hai
aise mukhḌe ki bala.en lijiye
bhola bhola pyara pyara ḳhuub hai
meri mahfil men kabhi aate nahin
ghair ke ghar men guzara ḳhuub hai
donon ankhen qatil-e-ushshaq hain
lashkar-e-mizhgan saf-ara ḳhuub hai
charḳh par tum ko chaḌha kar dekhiye
kaun sa taron men taara ḳhuub hai
tum jo aa.e jism men jaan aa ga.i
jaan men paira tumhara ḳhuub hai
paas apne ho agar tasvir-e-yar
zindagani ka sahara ḳhuub hai
kyuun milen ham aap se chori-chhupe
baat jo hai ashkara ḳhuub hai
tu kaha main ne to azurda hue
ghair ki gaali gavara ḳhuub hai
chand se baḌhti hai ankhon ki ziya
ḳhub-ruon ka nazara ḳhuub hai
doston se inhiraf achchha nahin
dushmanon se bhi mudara ḳhuub hai
maang balon men hi kya hai ab-dar
Dub-marne ko ye dhara ḳhuub hai
aabru jaati rahegi aap ki
‘bahr’ ab us se kinara ḳhuub hai
Leave a Reply