ashiq kahen hain jin ko vo be-nang log hain
maashuq jin ka naam hai vo sang log hain
kis tarah kasbiyon se rakhe koi ji bacha
sab jante hain in ko ye sarhang log hain
majnun tu ja ke dasht men fariyad kar ki aae
naale se tere shahr ke dil-tang log hain
aalam ke sufiyon ke koi kya samajh se
har rang se juda hain ye be-rang log hain
ham to na laal-e-lab ka tire bosa le sake
rakhte hain ye khayal jo be-dhang log hain
utra hai kaun aab men ye jis ke husn se
hairan khade hue ba-lab-e-gang log hain
mere lughat-e-sher ke aalam ko ‘mushafi’
samjhen hain vo jo sahib-e-farhang log hain
Leave a Reply