khvabon ka nashsha hai na tamanna ka silsila
ab rah gaya hai bas gham-e-duniya ka silsila
abad duur duur hain viran se kuchh maqam
ye bastiyan hain ya koi sahra ka silsila
gardish men jan-o-dil hon to kyunkar mile sukun
yaaro nahin ye saghar-o-mina ka silsila
do hi qadam chale the kisi ki talash men
phir mil saka na naqsh-e-kaf-e-pa ka silsila
insan ko silsilon se milegi najat kya
duniya ke baad hai abhi uqba ka silsila
apne vajud se bhi gile par hua tamam
itna badha shikayat-e-beja ka silsila
ik shahr-e-tishna-kam men jiite hain yuun ‘sahar’
aata hai roz khvab men dariya ka silsila