meer-hasan

Dildar Dil Is Tarah Baham Aae Nazar Mein

dildar dil is tarah baham aae nazar men

jis tarah guhar aab men aur aab guhar men

ik baar bhi dekha na use paas se ja kar

aaya hi nazar vo to kahin rahguzar men

har-chand ki hai sham-o-sahar vo hi par us bin

vo lutf na ab shaam men hai aur na sahar men

qismat se madad chahta huun itni ki har vaqt

manind-e-saba saath rahun us ke safar men

ik baar to naale ki ho rukhsat hamen sayyad

pinhan rakhen ham kab taiin fariyad jigar men

hosh-o-khirad-o-sabr-o-tavan uth chale ik ek

jaate hi tire chaal padi dil ke nagar men

kidhar ko nikal javen ‘hasan’ kya karen ham aah

bahar hi ye dil apna na lagta hai na ghar men

More Poems

Leave a Comment