Pandit Vidya Rattan Asi
masarrat chiiz kya hai ranj kya hai
ye saara khel ik ehsas ka hai
bahar-e-zindagi kahte hain jis ko
kisi ke ik tabassum ki ziya hai
ḳhata-e-bevafa.i aur ham se
yaqinan aap ko dhoka hua hai
abhi badli nahin insan ki fitrat
ye ab bhi dushman-e-mehr-o-vafa hai
kisi ke jaur ka had se guzarna
hamari ḳhamushi ki intiha hai
kisi ki bazm tak ho kya rasa.i
muqaddar hi hamara na-rasa hai
use kya vasta dair-o-haram se
vo jis ne raz-e-ulfat pa liya hai
hazaron rahaten us par nichhavar
tumhara gham jise raas aa gaya hai
kabhi sunte nahin hain aap varna
hamare dil men bhi ik mudda.a hai
main un ko pujta huun jaan se dil se
vo jin ke dil men ehsas-e-vafa hai
talatum-ḳhez maujon se guzar ja
lab-e-sahil khaḌa kya sochta hai
hamen mutlaq nahin ehsas ‘asi’
hamari zindagi be-asra hai
Leave a Reply