Hasil-E-Gham Yahi Samajhte Hain

hāsil-e-ġham yahī samajhte haiñ

maut ko zindagī samajhte haiñ

jis ko tere alam se nisbat hai

ham usī ko ḳhushī samajhte haiñ

tum sitam meñ kamī na farmāo

ham ise dushmanī samajhte haiñ

ham charāġhoñ meñ chāñd tāroñ ke

aap kī raushnī samajhte haiñ

shaiḳh jī haiñ farishtoñ ke ustād

aap unheñ aadmī samajhte haiñ

husn-e-mauzūñ ke zikr ko ‘anvar’

maqsad-e-shā.irī samajhte haiñ

Leave a Comment