Asim Wasti
maana kisi zalim ki himayat nahin karte
ham log magar khul ke baghavat nahin karte
karte hain musalsal mire iman pe tanqid
ḳhud apne aqidon ki vazahat nahin karte
kuchh vo bhi tabi.at ka sukhi aisa nahin hai
kuchh ham bhi mohabbat men qana.at nahin karte
jo zaḳhm diye aap ne mahfuz hain ab tak
aadat hai amanat men ḳhayanat nahin karte
kyuun in ko mila mansab-e-afza.ish-e-giti
ye log to miTTi se mohabbat nahin karte
kuchh aisi baghavat hai tabi.at men hamari
jis baat ki hoti hai ijazat nahin karte
tanzim ka ye haal hai is shahr men ‘asim’
be-saḳhta bachche bhi shararat nahin karte
Leave a Reply