Prem Kumar Nazar
pagal hava ke dosh pe jins-e-giran na rakh
is shahr-e-be-lihaz men apni dukan na rakh
us ka diya hua hai jism us ke supurd kar
rakhne ki is havas men tu donon jahan na rakh
is ka zaval dekh ke vo saltanat na chhoḌ
is zindagi men lamha-e-sud-o-ziyan na rakh
vo fasl pak chuki thi ab us ka bhi kya qusur
tujh se kaha tha jeb men chingariyan na rakh
vo jism hai to us ko faqat jism hi samajh
parda kisi fareb ka phir darmiyan na rakh
aa.egi har taraf se hava dastaken liye
uncha makan bana ke bahut khiḌkiyan na rakh
vo jism khul raha hai girah-dar-girah ‘nazar’
ye tiir chuuk ja.ega Dhili kaman na rakh
Leave a Reply