Bad-Gumani Ko baDha Kar Tumne Ye Kya Kar Diya

Nazeer Banarasi

bad-gumani ko baḌha kar tum ne ye kya kar diya

ḳhud bhi tanha ho ga.e mujh ko bhi tanha kar diya

zinda rakhne ke liye rakkha hai achchha silsila

ik miTaya dusra arman paida kar diya

aap samjhane bhi aa.e qibla-o-ka.aba to kab

ishq ne jab be-niyaz-e-din-o-duniya kar diya

bandagan-e-daur-e-hazir ki ḳhuda.i dekhiye

jis jagah jis vaqt chaha hashr barpa kar diya

kal ki kal hai kal jab aa.ega to samjha ja.ega

aaj to saaqi ne dil ka bojh halka kar diya

mohtaram pi lijiye mausam ne mauqa.a de diya

dekhiye kaali ghaTa ne uTh ke parda kar diya

vo ghar aa.e the ‘nazir’ aise men kuchh kahna na tha

shukr ka mauqa.a tha pyare tu ne shikva kar diya