vafadaron pe aafat aa rahi hai
miyan le lo jo qimat aa rahi hai
main us se itne va.ade kar chuka huun
mujhe is baar ghairat aa rahi hai
na jaane mujh men kya dekha hai us ne
mujhe us par mohabbat aa rahi hai
badalta ja raha hai jhuuT sach men
kahani men sadaqat aa rahi hai
mira jhagḌa zamane se nahin hai
mire aaḌe mohabbat aa rahi hai
abhi raushan hua jaata hai rasta
vo dekho ek aurat aa rahi hai
mujhe us ki udasi ne bataya
bichhaḌ jaane ki saa.at aa rahi hai
baḌon ke darmiyan baiTha hua huun
nasihat par nasihat aa rahi hai
Leave a Reply