apne daftar se nikalte hain to ghar jaate hain
log jiine ki tag-o-dau men bhi mar jaate hain
rat-bhar hote hain kis tarah na-jane yakja
sub.h-dam shahr ki saḌkon pe bikhar jaate hain
shaḳh-e-gul kitni hi faslon ke uThati hai azaab
rang-o-bu phuul men yuun hi nahin bhar jaate hain
hadse rahte hain yuun umr-e-ravan ke hamrah
jaise amvaj ke hamrah bhanvar jaate hain
ajnabi shahr men shayad koi apna mil jaa.e
jis jagah bhiiḌ nazar aa.e Thahar jaate hain
jab bhi mar jaata hai muflis kisi kumbe ka kafil
ek ke saath ka.i aur bhi mar jaate hain
mujh ko malum hai jab main nahin hota maujud
ḳhud-baḳhud aap ke gesu bhi sanvar jaate hain
Leave a Reply