majrooh-sultanpuri

Aa Nikal Ke Maidan Mein Do-Rukhi Ke Khane Se

aa nikal ke maidan men do-rukhi ke khane se

kaam chal nahin sakta ab kisi bahane se

ahd-e-inqalab aaya daur-e-aftab aaya

muntazir thiin ye ankhen jis ki ik zamane se

ab zamin gaegi hal ke saaz par naghme

vadiyon men nachenge har taraf tarane se

ahl-e-dil ugaenge khaak se mah o anjum

ab guhar subuk hoga jau ke ek daane se

manchale bunenge ab rang-o-bu ke pairahan

ab sanvar ke niklega husn kar-khane se

aam hoga ab hamdam sab pe faiz fitrat ka

bhar sakenge ab daman ham bhi is khazane se

main ki ek mehnat-kash main ki tirgi-dushman

subh-e-nau ibarat hai mere muskurane se

khud-kushi hi raas aai dekh bad-nasibon ko!

khud se bhi gurezan hain bhaag kar zamane se

ab junun pe vo saaat aa padi ki ai ‘majruh’

aaj zakhm-e-sar behtar dil pe chot khane se

More Poems

Leave a Comment