Khalid Shirazi
jab shaḳh-e-gul chaTaḳh ke giri raaz ki tarah
ḳhushbu ka dil laraz uTha avaz ki tarah
vo dhuul jis ko di na kisi shahar ne amaan
lipTi hui hai paanv se dam-saz ki tarah
itna havas-gir tha suraj ka iztirab
manzar badal ga.e tire andaz ki tarah
paanv tale zamin nahin lekin ḳhalaon se
rishta mila raha huun rag-e-saz ki tarah
is munjamid sukut men ‘ḳhalid’ miri sada
pathra ga.i hai hasrat-e-parvaz ki tarah
Leave a Reply