Zeeshan Ilahi
raat ki ḳhamoshi ka matha Thanka tha
jaane kis ke haath ka kangan khanka tha
jhiil ne apne siine par yuun Taank liya
jaise main avara chand gagan ka tha
us ka lawn baharon se abad raha
suukh gaya jo peḌ mire angan ka tha
tere qurb ki ḳhush-bu se maghlub hua
dil men jo aaseb akele-pan ka tha
dil se dar-o-divar ki ḳhvahish kyuun na ga.i
sahra ka mahaul to mere man ka tha
raam use kar leta sachcha ishq mira
lekin vo ‘zishan’ pujari dhan ka tha
Leave a Reply