miri baat ka jo yaqin nahin mujhe aazma ke bhi dekh le
tujhe dil to kab ka main de chuka use gham bana ke bhi dekh le
ye to Thiik hai ki tiri jafa bhi ik ata mire vaste
miri hasraton ki qasam tujhe kabhi muskura ke bhi dekh le
mira dil alag hai bujha sa kuchh tire husn par bhi chamak nahin
kabhi ek markaz-e-zist par unhen saath la ke bhi dekh le
mire shauq ki hain vahi ziden abhi lab pe hai vahi iltija
kabhi is jale hue tuur par mujhe phir bula ke bhi dekh le
na miTega naqsh-e-vafa kabhi na miTega haan na miTega ye
kisi aur ki to majal kya use ḳhud miTa ke bhi dekh le
kisi gul-e-fasurda-e-bagh huun mire lab hansi ko bhula chuke
tujhe ai saba jo na ho yaqin mujhe gudguda ke bhi dekh le
mire dil men tu hi hai jalva-gar tira aa.ina huun main sar-basar
yunhi duur hi se nazar na kar kabhi paas aa ke bhi dekh le
mire zarf-e-ishq pe shak na kar mire harf-e-shauq ko bhuul ja
jo yahi hijab hai darmiyan ye hijab uTha ke bhi dekh le
ye jahan hai ise kya paḌi hai jo ye sune tiri dastan
tujhe phir bhi ‘mulla’ agar hai zid gham-e-dil suna ke bhi dekh le
Leave a Reply